Ich muess grad mini Gfühl eifach emal uf Mundart los werde, wili so eifach no klarer cha sage wasi denke. I dem Brief weti allne Gfühl wo im moment grad i mier inne sind platz ge.
Min Wuet isch grad ziemlich gross und ich bin eifach sauer, wenn ich gseh wo dure das mier im Läbe gönd. Mier Mensche lönd üs i so vieli vieli Muster inne drücke ohni das miers merked. Es isch egal bi was. Immer redet mer devo das d Individualität soo wichtig isch. Aber eigentlich gid Jede en scheiss drum wo sini Indiviualität bliebt!
Ja grad mier Naturheilpraktiker sötted da en Schritt vorus si. Grad mier sötted wüsse wo isch mini Mitti, was passt mier und was passt mier ned. Aber nei au mier lönd üs i eis System nachem andere la drücke. Und um was gaz am Schluss?! Nume ums Geld! Natürlich müend mier chöne überläbe. Aber isch mer darum bereit sich immer ufd Finger luege z la? Ich bin kei Arzt, suscht hetti au chöne Medizin studiere. Ich sött au kei Prinzipie riter si, suscht wird’s öppe schwierig. Eidg. Dipl. das isch wichtig, suscht zahled üch bald kei Chrankekasse meh. Wird mini Leistig dra gmässe öb ich jetzt bereit gsi bin nomal 10'000.- uszge und nomal 5 prüefige z mache oder wird si dra gmässe wie ich i minere Praxis mit de Patiente umga und was mini Überzügige sind?! Genau dur sörtigi Sache verlüred mier jedi aber würklich jedi Freiheit. Isch das s Ziel vomene Naturheilpraktiker?! Ich hoffes schwer ned will suscht chasch dich au Arzt mit Chrüter nänne. Und das isch doch genau das wo mer ned wend! Doch trotzdem folgt Jede eifach unufgforderet dem Trott. Ja machi, ja muessi, ja dueni.
Überleg doch zerst emal was DU wotsch! Gaz i dim Bruef drum de Mänsche öppis chöne z ge oder gaz drum dich a inne z berichere? Gaz drum ihne es Ohr z schenke, wo si a andere ort ned bechömed? Oder gaz drum dir en name z mache und praxis voll z ha?
Mis Votum gad vor allem a alli Therapeute da use. Es gad aber au euch. Überleged doch bi üchere Therapeutewahl wer iher usläsed. Muess vore dra eidg. Dipl. stah nur will vo dem sim schaffe alles überno wird oder hani lieber en Therapeut wo würklich Ziit hed, sis ding macht und das eso macht, will er devo überzoge isch und ned nur will er weiss das es chönti helfe?
Den staht bi mier halt vielleicht ned eidg. Dipl. sondern nur dipl. aber eigentli macht das überhaupt kei unterschied. Will glernt hani genau glich viel und wenn ich mit Herz schaffe, han ich am Schluss viel meh vo mim Bruef als Mänge ander. Ich bin bereit das izga, au wenn ich mit ibuesse rechne muess. Aber die Angstmacherei und das Geldgstürte lebe findi eifach ächt zum chotze!
Mier würed no zu vielem chöne Nei säge wen mier üs nur würed traue mal öppis anderst z mache wies alli anderi möched! Doch äbe lieber alles sicher ha weder mier en Wert uf mini Individualität z ge. Zerst überlege vorem handle.
Min Friede isch wieder ordentlich kuriert nach mim Gfühlsusdruck i dem Brief und ich weiss eimal meh für was es sich zu kämpfen lohnt.
Bis bald
Simone
Kommentar schreiben